Aizawl, Tue, 17 Nov, 2020: SEDP hnuaia Veterinary, Fishery & Sericulture Board chuan vawiin khan chairman Dr. K. Beichhua kaihhruaina hnuaiah Board hmalak zel dan tur ngaihtuahin Secretariat Conference Hall, MINECO ah an thukhawm a, SEDP hnuaiah AH & Vety Department hnuaia tanpuina dawng turte tlangzarhna hun November 25, 2020 hian hman a rel nghal.
AH&Vety Department hnuaiah kum 2019-2020 a SEDP kalpuina atan hian cheng nuai 1860 ruahman a ni a, Board meeting chuan vawiin khan vawk leh ar vulh tanpuina dawng tur beneficiary chhungkaw 1020 thlanchhuah tawhte chu a pawmpui nghal a ni.
Chairman Dr Beichhua chuan tluang taka an kal chhoh zel theih chuan sa, artui leh bawnghnute ah Mizoram a intodelh theih a beisei thu sawiin, Chief Minister pawhin an hmalakna chu a tuipui hle tih a sawi a, SEDP thil tum angin ranvulh lamah thalai tam takin ke an pen mek chu lawmawm a tih thu a sawi bawk.
AH& Vety Department hnuaiah SEDP Pilot Project chu kumin March thla atanga hmalak tan theih an inbeisei laiin COVID-19 hrileng avangin hma an la chak thei lo chu pawi a tih thu Chairman Dr Beichhua chuan a sawi bawk a, mipui ngaihhnathiamna a ngen nghal bawk.
Chairman chuan November 25, 2020 ah official a tlangzarh a nih hunah AH&Vety department atanga SEDP hnuaia Vawk leh ar vulh tanpuina dawng turte pawisa chu district tina District Veterinary Officer te hnenah 1st installment release nghal anih tur thu a sawi bawk.
Sericulture Department hnuaiah Northeast Region Textile Promotion Scheme chu kum 2018-2019 ami kalpui zel a la nih thu sawiin, heihi SEDP nena thlunzawm nghal a ni a, NERTPS guideline anga kalpui a ni, a ti.
NERTPS atan hian kum 2018-2019 ah cheng vaibelchhe 11.56 hmuh a ni a, Mamit Aspirational District ah chhungkaw 500 in pangang khawi tanpuina an dawng tawh a, SEDP Board on zirchianna a neih tawhah chhungkaw 308 in tha takin he scheme hi an kalpui a, chhungkaw 119 erawh training leh enpui te la ngai an ni a, hetihlai hian Board chuan chhungkaw 73 te hmalakna erawh hmuh tur a awm loh avangin cancel a, a tui zawkte tanpuina pek a remti a ni.
Meeting ah hian Board Vice Chairman C. Lalmuanpuia MLA pawhin thu sawiin, COVID-19 hrileng avanga harsatna hrang hrang karah ran vulh lama tui miten SEDP kaltlanga tanpuina an hmu thei tur chu lawmawm a tih thu leh tihtakzeta, hlawhtling ngei turin tanpuina dawngte a ngen nghal.
AH & Vety Department hnuaia SEDP Pilot Project atana District tina Beneficiaries zat chu ahnuaia mi ang hi a ni:
- Aizawl 616
- Lunglei 155
- Siaha 90
- Mamit 35
- Kolasib 32
- Champhai 33
- Serchhip 29
- Lawngtlai 20
- Total 1020
