Dr. Lalnuntluanga Colney
Jt. Director (LH)
Vawiin ni 28th September,
2019 hi World Rabies Day a ni a. Hemi denchhena A.H. & Veterinary
Department aiawha thuchah ka sawi thei tur hi lawmawm ka ti a, uluk taka min lo
ngaihthlaksak turin ka ngen tak meuh meuh che u a ni.
World
Rabies Day hi kum 2007 atanga hman tan niin, kum tin hman thin a ni a, kumin hi
kum 13-na a ni. He ni hi French Chemist Louis Pasteur-a, Microbiologist ni bawk
thihcham hriatreng nana hman a ni. Louis Pasteur-a hi anti-rabies vaccine (ui a
hri danna) siam chhuak hmasa bertu a ni nghe nghe. Kum 2019 World Rabies Day
theme chu “Vaccinate to Eliminate”
tih a ni a. Hemi awmzia chu ui a hri danna hmanga ui a hri tih rem /umbo tihna
a ni ber ang chu.
“Rabies” hi Mizoin “Ui A hri” kan tih hi a ni a. Mihringin ran atanga kan kaichhawn theih natna tihbaiawm berte zing a mi a ni. A natna thlentu ber chu natna hrik te takte virus – lyssa virus a ni a, ui bakah chinghnia, sihal, zawhte, zawng leh bak te hian an vei thei vek a ni. Ui hi India ram a Ui A hri mihringa thlentu bera ngaih a ni. India ramah kum tin mihring maktaduai 15 te hi ransa in a seh ziah anga ngaih a ni a, chung zingah ui seh a tam ber a ni. Kum 1985 atang khan kumtinin mi 25000-30000 vel hi ui a hri avanga thi ziah anga chhut a ni.
India
rama ransa in mihring a seh zawng zawng 91.5% hi Ui seh an ni a, chung ho zing
atang chuan khawlaia ui vakvai (stray dog) seh hi zaa 60% an ni. Tin, zaa 40%
hi ui vulh pangngaiin a seh an ni. Tin, mihring sangkhat zelah 17.4 te hi ranin
a seh ziah anga chhut an ni. Chuvangin second 2 dan zelah ranin mihring a seh
ziah anga chhut a ni a, tin, darker chanve dan zelah Ui a hri avanga mihring
thi ziah anga chhut bawk a ni. Ranina mihring a seh avanga inenkawlna senso hi
US dollar $40.00 (chu chu India pawisa chuan Rs. 3,500.00 ang vel a ni) anga
chhut a ni. Hetiang ang taka ui leh ran dang seh hi mihringa a tam avang leh a
pun chak tak avangin, a seh hnua inenkawlna tur mamawhna pawh a sang chho hle a
ni. Hemi avang hian India ramah hian Ui a hri a leng ta nge, ui vakvai pun chak
lutuk vang nge, mihring tam lutuk vang zawk tih hi zawhna lian tak a ni chho
mek a ni.
Ui
seh tuartu tam berte hian, anmahni sehtu leh rawn beitu ui te an hrechiang
chawk a, a tuartu tam berte hi naupang an ni. Tin, naupang uiin a seh tam berte
chu mipa naupang kum 5-9 te an ni. Uiin
a seh naupang kum 10 hnuailam te hi an lu leh nghawngah a seh tlangpui a, hei
hi a chhan ber chu naupang san zawng leh a sehtu ui san zawng a in tluk thuak
vang a ni. Taksa hmawr lam kut leh kea seh tuartu tam takte hi a tlangpuiin
naupang upa lam leh puitling an ni. Ui sehna hliam hi pem tereuhte atanga hliam
nasa tak te pawh a ni thei. Ui seh satliah hian, a tirah pem/hliam emaw tih loh
chu thihna a thlen nghal thut lo. Ui te hi anmahni chi (breed) a zirin mi seh
an hratin an hrat lo thei bawk. Alsatian, Bull Terrier, mixed breed te hian mi seh
an ching zual.
Chuvangin,
uiin mi a seh reng rengin a sehna lai chu a pilh a nih chuan sahbawn nen uluk
taka silfai a, tui khawh lai / running tap water-ah minute 15 chhung vel dah
vang vang tur a ni. Chumi zawhah chuan povidine iodine te hnawihin damdawi inah
kalpui vat tur a ni. A hliam nat dan leh a sehna hmun a zirin medical doctor
te’n treatment lak a ngaih leh ngaih loh chu thutlukna an lo siam mai dawn a
ni. Kan ngaihsak vat lohva natna a lo lanchhuah meuh chuan a lo tlai lutuk hman
tawh thin a, thihna hial a thlen thin a ni. Rabies hi ui seh atang chauhva kai
theih emaw a nih kan tih laiin, ui chilah natna hrik a awm avangin kan taksaa
pem emaw hliam emaw kha uiin a liah chuan he natna hi a kai ve theih tho a ni.
Chu mai ni lovin, mita a luh leh ui, he natna vei thluak khawih leh ei atang
pawhin a kai theih bawk.
He
natna mihringa a lanchhuah dan chu – khawsik, luna, luakchhuak, awm hle hle
thei lo, chiai, thil lem tha thei lo, chilthli tla nasa, tui hlauhna, mit a vai
ruai a, an mu thei lova, a tawpah taksa zeng angin an awm a an thi mai thin a
ni.
Rabies
hi hri danna (anti-rabies vaccine) hmanga umbo theih a ni a, chuvangin A.H.
& Vety Department hian Ui a hri danna pek hi a ngai pawimawh hle a, heng – State Vety Polyclinics, Aizawlah te,
District tina State Vety Hospital-ah te leh hmun hrang hranga Dispensary-a kan
doctor te awmna chin zawng zawngah hian a hri danna hi Certificate man Rs.50/-
leh registration fee Rs. 10/- chauh pe in a lak theih reng a ni.
Department-in man tlawm zawka vaccine a pek theih reng tho avangin ui vulhtute zawng zawng hian a hun takah kan uite ui a hri danna kan pek hi kan ngai pawimawh hle tur a ni. Ui kan vulh duh a nih chuan ui a hri danna pek hi kan mawhphurhna a ni tih hria ila tih hi vawiina kan thuchah ber a ni e. Ka lawm e.
