Mizoram Veterinary Service Association (MVSA) chuan vawiin khan MVSA Annual General Conference vaqi 37-na Vety Rest House, Selesih-a neih mekah AH & Vety Minister Dr. K. Beichhua hovin AH&Vety Department Director Dr Hmarkunga pension a chhuak tur an thlah.
AH & Vety Department senior officer pension an thlahte hi Director Dr. Hmarkunga, Additional Director Dr. Lalnuntluanga Colney, Joint Director (Polyclinic) Dr. R. Thangthuama leh Joint Director (Planning & Monitoring) Dr. K. Lalrohlua te an ni a, February 28, 2021 hian Superannuation pension in a chhuak tawh dawn a ni.
AH&Vety Minister Dr. K. Beichhua chuan pension a chhuak turte thlahna thuchah sawiin, pension a chhuah dawnah project in siam a pawimawh thu a sawi a, Mizoram tana an service an lo hlan tawhnate ropui a tih thu leh amah ngei pawh an kaihhruainaah lawmawm a tih thu a sawi.
Dr Beichhua chuan Vety Service rual kalkhawmte chu Vety service ah hian ka damchhungin eng contribution nge ka neih theih tih an rilruah awm se tih a duhthu sawiin, service a la awm te leh Pension a chhuak tawhte pawhin he department hi ka ta a ni, a chhiat a thatin ka mawhphurhna a ni, tiin rilru pu chhunzawm zel tura a duh thu a sawi bawk.
AH&Vety Secretary Pi Lalzarmawii, IAS chuan pension-a chhuak turte chu pension hun hlimawm tak hmang turin duhsakna a hlan.
Pension a chhuak tur Director Dr. Hmarkunga chuan MVSA in thlahna an buatsaihsak chu lawmawm a tih thu sawiin, a service chhunga tha taka amah tawiawm thintu staff leh doctor zawng zawngte chungah lawmthu a sawi.
Dr Hmarkunga chuan amah thlahtu a Veterinarian puite chu Mizorama ranvulha eizawngtute tan theihtawp chhuah zel tur leh service an luh dawna an thutiam an lakte hre reng turin a chah nghal bawk.
MVSA President Dr. C. Lalrintluanga chuan association aiawha pension a chhuak turte thlahna thuchah sawiin, Director leh Senior officer te chu an department atana sulsutu an ni a ti a, an chhuak tur chu an ui thu leh an hmunruak hnawhkhah huphurhawm a tih thu a sawi.
Dr Lalrintluanga chuan pension a chhuak tur an senior officer te chu an service chhunga harsatna tawk lo va, service a tawp thlenga an hmang thei chu lawmawm a tih thu a sawi bawk.
