25th November, 2020, Aizawl: Animal Husbandry & Veterinary Minister Dr. K. Beichhua chuan ni vawiin Khatla-a Veterinary Polyclinic Hospital, Conference Hall ah AH&Vety Board hnuaiah Socio Economic Development Programme (SEDP) Pilot Project a tlangzarh.
Tlangzarh inkhawm hi Social Distance tha taka vawngin programme buatsaih a ni a, District tina District Veterinary Officer leh staff ten Video Conference kaltlangin he programme hi an lo chhim a ni.
SEDP AH & Vety Board chairman ni bawk, Dr Beichhua chuan Board member te chungah lawmthu sawiin, COVID-19 hrileng karah SEDP ran vulh tanpuina an pechhuak thei tur chu Board member te leh official te thawhrimna vang a ni, a ti.
Dr Beichhua chuan SEDP kaltlanga ran vulh tanpuina an pek tur chu a thlawna sum sem anga ngai lo turin a dawngtute a ngen bakah COVID-19 hrileng avang te leh Vawk hri natna, African Swine Fever kan thenawm state ah len avangin sa lam chi lakluh khap a ni a, Mizoramin sa kan mamawh zat kan tharchhuah loh avangin kan intodelh theih nan SEDP ran vulh tanpuina hi intodelhna atana hmalakna a ni, tih hriatsak turin a ngen nghal.
SEDP kaltlanga tanpuina an pek turte chu Pilot Project a nih angin theihtawp chhuaha hlawhtlinpui ngei turin duhsakna a hlan bawk.
"Sorkar sum harsatna karah SEDP tanpuina an pechhuak tiin miin an sawi thei e, he sum hi kum 2019-2020 Financial Year a mi a ni a, hrileng avangin tlanchhe thei kan ni lova, sa ah hian intodelh ila, state dangah te thawnchhuak thei hial ila tih kan duh, chuvangin hei hi sa lama kan intodelh tura hmalakna a ni, tih min hriatpui tur leh kan hmalakna min thlawp tlat turin Zoram mipui ka ngen nghal a ni, tiin Dr Beichhua chuan a sawi bawk.
Kum 2 chhunga AH&Vety Department hmalakna leh hlawhtlinna te tarlangin, Vety Dispensary 7 chu Hospital puitlingah hlankai a nih bakah Rural Animal Health Centre 35 chu Dispensary ah hlankai a ni tawh tih a sawi a, Veterinary Hospital building thar district 7 ah sak mek a ni bawk a, Animal Check gate hmun khaw 10 ah hawnbelh a ni bawk a ti.
AH & Vety Department hnuaia kum 2019-2020 financial year atana SEDP Pilot Project kalpuina atan hian Planning Board chuan cheng nuai 1895.28 a ruahman a, hemi atang hian vawk vulh, vawkpui vulh, Broiler ar vulh leh Rainbow Rooster ar vulh tanpuina pek tura ruahman niin, beneficiary chhungkaw 1020 an awm dawn a ni.
Vawkpui vulh tanpuina hi beneficiary 20 te hnenah Rs cheng nuai 3 theuh pek an ni ang a, Vawkvulh tanpuina beneficiary 200 te hnenah cheng nuai 3 theuh pek an ni bawk ang. Broiler ar vulh tanpuina hi beneficiary 400 te hnenah Rs cheng nuai 1.5 theuh pek an ni anga, Rainbow Rooster ar vulh tanpuina beneficiary 400 te hnenah Rs 1.5 theuh pek an ni bawk ang.
Tanpuina hi Installment vawi hniha pek an ni anga, District tina District Veterinary Officer (DVO) ten beneficiary te training an pek vek hnuah DVO account atangin a dawng turte account ah tanpuina sum hi dahluh tura ruahman a ni.
SEDP Pilot Project tlangzarh inkhawm hi AH&Vety Department secretary Pi Lalzarmawii'n a kaihruai a, Director Dr. Hmarkunga'n technical report a pe a, SEDP AH & Veterinary Board Vice-Chairman Pu C. Lalmuanpuia MLA in lawmthu sawiin, programme tihtawp a ni.
District tina Beneficiaries zat:
Aizawl 616
Lunglei 155
Siaha 90
Mamit 35
Kolasib 32
Champhai 33
Serchhip 29
Lawngtlai 20
Total: 1020
