Department of Animal Husbandry and Veterinary, Government of Mizoram, India

Aizawl the 2nd June, 2020: Chief Minister Pu Zoramthanga chuan vawiin khan Thenzawla AH & Veterinary Department Complex-a Goat Breeding Farm chu a hmunah a tlawh. AH & Vety Minister Dr. K. Beichhua, Veterinary and Fishery Board Vice Chairman Pu C.Lalmuanpuia, Adviser to CM Pu C. Lalramzauva leh AH & Vety officer ten an tawiawm a ni.

AH & Vety Department hotute leh Thenzawl farm-a thawktute nen inkawmin Chief Minister chuan hun harsa leh manganthlak tak tawng mek ni mah ila tun hi intodelh tura tan lak a ngaihzia lan tirtu a nih thu sawiin, theihtawp kan chhuah a tul a ni, a ti a. Harsatna dang engpawh lo thleng se ei leh ina kan intodelh chuan mipui tawrhna hi nasa takin a ziaawm phah dawn avang leh, economy siamtha a, hmasawn zel tur chuan intodelh hi a pawimawh hmasak zel thu te Chief Minister chuan a sawi a. Mizoram chu state vannei tak, leilung ngheng a eizawnna tha tak tak kalpui theihna, ram zau tak, a chhunga chengte chawm zo leilet zau tak siam theihna, sik leh sa leh ruah tui duhthusam a nih thu Pu Zoramthanga hian sawiin, agriculture, horticulture leh animal husbandry and veterinary lama ngawrh zawka hmalak thar hi ei tura intodelh dawn chuan a pawimawh, a ti a. Vawiina Thenzawl farm-a kel lian chi inthlahpunna hmun leh hmalakna dang a en te chu theihtawp chhuah a kalpui a, ranvulhtute tana hamthatna a thlen ngei a beisei thu a sawi a ni.

AH&Vety Minister Dr. K. Beichhua chuan tunlai hrileng ang chi leh natna hri dang reng reng hi do thei tur chuan taksa hrisel a pawimawh thu leh, taksa hrisel nei tur chuan ei tur tha, hrisel leh thianghlim neih a tul thu a sawi a. Ei tur tha leh hrisela kan inchawm theih nan tunah hian Mizoram chuan hma a lak mek thu a sawi a ni. Vety Minister chuan ranvulh hi eizawnna tha leh hlawk tak a nih thu leh, thalaite zingah pawh tui thar an tam avangin entrepreneurship lama thalaite hnuhluhna remchangah ranvulh hi department chuan siamin, hma a lo lak tawh dan te a sawi bawk.

Thenzawl Goat Breeding Farm hi ran vulhtute tan a hlawk zawkna turin eizawnna tling tak tak tur kel lian chi thlahpunna tura ruahman a ni a. NABARD-RIDF hnuaia sum hmuh hmanga siam a ni a. Rajasthan leh Punjab atangin kel chi tha, Sirohi leh Beetal te chu nikum April ni 11, 2019 khan 83 lakluh a ni a. Kumin May ni 26, 2020 khan a thawh hnihna atan 97 lakluh leh a ni a. Tunah hian a note 21 hralhchhuah a ni tawh.