Animal Husbandry & Veterinary Minister Dr. K. Beichhua chuan 6^th Octber, 2021 khan Serchhip P&E Venga, District Veterinary Hospital leh Satellite Boar Semen Station a hawng. 

 Satellite Boar Station hi Vawk Kah Rai, Artificial Insemination tihna atana vawk chi tha sawngbawlna hmun a ni. 

Hawnna inkhawmah AH&Vety Minister Dr. K. Beichhua chuan thuchah sawiin, kum 2018 Sorkarna kan chelh atangin vawk sa leh sa danga Mizoram kan intodelh lohna hriain, ngaihtuahna kan seng nasa hle a ti a, kum 2013, kum 2016 leh kum 2018 ah PRRS hri a leng nasa hle tih a sawi a, hei vang hian ran hrileng lak atanga kan him zawk nan kum 2019 atangin ram pawn atanga ran lakluh khap a ni, a ti a, amaherawhchu mi thuawih lo thenkhat avangin ram pumin kan tuar ta a ni, a ti. 

Dr. Beichhua chuan African Swine Fever (ASF) avanga harsatna tuar mek, vawk vulhte a tawrhpui tak zet tih sawiin, vawk suat takte zangnadawmna kan pek ngei theih nan Central Sorkara scheme awmsa theihtawp chhuahin kan bawhzui mek tih a sawi a, amah ngei leh SEDP Veterinary Board Vice-Chairman Pu C. Lalmuanpuia, MLA pawhin Central Ministry an zuk dawr tawh tih a sawi a, hlawhtlinna an hmuh ngei a beisei thu a sawi bawk. 

Vety Minister chuan Serchhip Hospital building thar leh Boar Semen Station hawn chu khaw mipuite tan hmasawnna rahbi thar a ni, tiin Mamit, Siaha, Champhai, Lunglei leh Lawngtlaiah te pawh District Hospital hi hawn theih thuai a beisei thu a sawi bawk. 

Kan rama thiltha te ei thei turin mipui lam pawhin mawhphurhna sang tak kan nei a ni, tiin Vawk vulh a thara kalpui leh na turah pawh mipuite chu tha taka sorkar thawhpui zel turin a sawm nghal. 

SEDP Veterinary Board Vice-Chairman Pu C. Lalmuanpuia, MLA pawhin thuchah sawiin, Covid-19 hrileng karah Serchhip District Veterinary Hospital leh Boar Semen Station hawn theih a ni chu Mizoramin Pathian hruaina kan dawn a ni, a ti a, lawmawm a tih thu a sawi. 

Vawiina Serchhip Veterinary Hospital hawn tak hi NABARD-RIDF XXIII atanga Cheng Nuai 90 senga sak niin, chhawng hnih (ground floor leh First Floor) niin, kum 2019 March thla khan sak tan a ni. He hna thawktu Contractor hi Malsawm Construction & Consultancy Service, Aizawl an ni. 

Vawk chi tha sawngbawlna hmun, Satellite Boar Semen Station hi National Livestock Mission atanga Fund leh FOCUS nen tangruala an sak niin, Vawk dahna, a chi lakna, a chi sawngbawlna Laboratory, Tui dahkhawlna, Thawktute inthlakna pindan, biosecurity gate leh office siam nan Rs cheng nuai 85 sen a ni. 

Vety Hospital hawnna inkhawm hi AH&Veterinary Department Secretary Pi Lalzarmawii, IAS in a kaihruai a, AH&Vety Director Dr. H. Laltlanmawia'n Technical Report pein, Serchhip District Veterinary Officer Dr. R. Lalmakthanga'n lawmthu sawiin inkhawm tihtawp a ni.