Animal Husbandry & Veterinary Minister Dr. K. Beichhua chuan tukin zingkar khan Mualpui leh Bawngkawn Brigade, Aizawla AH& Vety Department Ran Talhna In a tlawh. 

Vety Minister Dr. K. Beichhua chuan Ran Talhna In,  Slaughter House changtlung zawk nei turin sorkarna an lak phat atangin hma a la nghal tih sawiin, project proposal an thehluhte chu Central Ministr-ah a la inchiah a, a hlawhtlinna an hmuh thuai a beisei thu a sawi. 

Dr. Beichhua chuan Mualpuia Ran Talhna In bawlhhlawh leh thli luangchhuak chungchanga Mualpui mipuiin harsatna an tawh chungchangah Ran Talhna In chu khawpui atanga hmun hla deuh, fianriala awm thin a ni, mahse kum 10 a ral meuh chuan khawpui a thang lian ve zel a, hmun fianrial a lo ni tawh lova, hetiang a nih avangin Mualpui mipuite harsatna pawh an hriatthiampui thu leh a tul angin, sorkarah bawhzui nghal an tum thu a sawi bawk. Bawngkawn Brigade rama Department Sa Talhna In a tlawhnaah Vety Minister chuan a panna kawng siamthat ngai tawh pawh a rang lama hmalak nghal an tum thu a sawi bawk. 

Vety Minister Dr. Beichhua chuan vawk pul hrileng, African Swine Fever (ASF) vangin Mizoramah vawk 27774 a thih tawh thu leh vawk 13024 dan anga suat (cull) a nih tawh thu a sawi bawk a, Central sorkar atanga zangnadawmna pek thin state sorkar nen za zelah 50 ve ve a, in tum sem tura tih chu State harsa kan nih avangin 90:10 kalphunga pe turin an dil nghal tih a sawi bawk a, ASF vanga vawk thi neituten zangnadawmna kawng dang atanga an hmuh theihna atan Disaster Management & Rehabilitation Department chu Khuarel Chhiatna (Calamity) ah puan tir tura hma an lak thu leh Disaster Respond Fund atanga zangnadawmna hmuh theih a beisei thu a sawi bawk. 

Dr. Beichhua hi Agriculture Development Board Vice-Chairman Pu H. Biakazaua leh official ten an tawiawm.