Animal Husbandry & Veterinary Minister Dr. K. Beichhua chuan vawiin khan Mamit District ran damdawi in leh Vawk kah raina atana a chi sawngbawlna hmun a hawng.
Hawnna inkhawm AH&Vety Office Training Centre-a neihah AH& Vety Minister Dr. K. Beichhua chuan thuchah sawiin, Mizoramin hun khirh tak a tawh mek karah Chief Minister Pu Zoramthanga kaihhruai sorkar chuan a ram neitu rilru puin tumah kutkuangkuaha thu mai lovin theihtawp chhuah theuh ang u tiin ke an pen theuh tih a sawi a, hun harsa tak karah ei leh barah te, eirawngbawlna gas ah te harsatna nei lovin kan kal mek a ni, a ti. Vety Minister Dr. Beichhua chuan a fing leh tha ber ni lo mahse Pathianin an hma a hruaisak zel anga, he hun harsa atang hian Zoram an hruaichhuah ngei a beisei thu a sawi. Dr Beichhua chuan ran hriselna leh mihring hriselna chu thil kal kawp tlat a ni tih sawiin, kan sa ei te a hrisel loh chuan mihring tan a hrisel theih loh tih a sawi a, ran vulh leh an hriselna kawngah Zoram mipui an harh thar zel nia a hriat thu leh lawmawm a tih thu a sawi nghal.
Dr Beichhua chuan Mamit District RD Block pathum ah Mobile Veterinary Unit pek an nih tur thu leh District Veterinary hospital tan X Ray khawl leh Ultrasound pek an nih tur thu a sawi nghal.
SEDP AH&VETY & Sericulture Board Vice Chairman Pu C. Lalmuanpuia, MLA pawhin thuhchah sawiin, Mamit District Vety Hospital an hawng thei chu lawmawm a tih thu leh Covid hrileng karah Minister leh officer & staff te a awm mai mai lo tih a chiang hle a ti.
Pu Muanpuia, MLA chuan sorkarin hun tha a nei zel anga, sa ah Mizoram an intodelh ngei a beisei thu sawiin, SEDP pawh tawpsan mai an tum loh thu leh, hrileng a ziaawm deuh chuan an chhunzawm leh ngei a beisei thu a sawi bawk.
District Veterinary Hospital hi NABARD RIDF-23 hnuaia loan hmuh atanga sak niin, project cost hi cheng nuai 90 a ni a, kum 2029, March thlaah sak tan niin, October, 2021 ah sak zawh a ni. Building hi ground floor leh a chungah floor khat a awm a, Room 14 awmin, toilet 4 a awm nghal bawk.
Vawk chi tha sawngbawlna (Satellite Boar Semen Station) pawh Mamit Vety Farm ah din niin, National Livestock Mission atangin cheng nuai 85 senga sak a ni a, vawk chi sawngbawlna te, vawk pa chi tha dahna te thildang pawimawhte a awm.
Mamit Veterinary Hospital hawnna inkhawm hi AH&Veterinary Secretary Pi Lalzarmawii, IAS in a kaihruaia, Director Dr. H. Laltlanmawia'n Technical Report pe in, Mamit District DVO Dr. F Vanlalruata'n lawmthu sawiin hun tihtawp a ni.
