Animal Husbandry & Veterinary Department Minister Dr. K. Beichhua chuan vawiin, ni 18/11/21 khan Lawngtlai-ah District Veterinary Hospital a hawng. Hawnna inkhawm A.H & Vety Complex,Training Centre-a neihah A.H & Vety Minister Dr. K. Beichhua chuan thuchah sawiin, Covid hrileng avanga harsatna hrang hrang karah A.H & Vety Hospital an hawng theite hi harsatna karah sorkar a chawl mai mai lo tih a lanna a ni, a ti.
Vety Minister Dr. K. Beichhua chuan Lawngtlai Vety Dispensary chu Hospital emaw kan lo ti thin tih sawiin, Hospital a lo nih loh thu Dispensary a lo nih zawk thu sawiin an sorkar hnuah Hospital ah an hlangkai chauh tih a sawi bawk. Sorkar Flagship Programme SEDP kalpui chungchangah Dr. K. Beichhua chuan nakkum ah bul kan tan ang an tih thin chu Vety Department chuan kum 2019-2020 atan chhungkaw 1020 hnenah vawk leh ar vulh tanpuina an semchhuak tawh a sawi a, Sericulture Department pawhin chhungkaw 1000 hnenah SEDP tanpuina an pechhuak tawh tih a sawi bawk. Dr Beichhua chuan Vawk leh Ar chungchangah natna darh thei a nih avangin kan zavai kan that tlanna atan sorkar ruahmanna siam te tha taka zawm turin mipui a ngen nawn leh a, vawk pul hri, African Swine Fever pawh mi thenkhat sorkar thupek zawm lo va, a ruka rampawn atanga vawk lalut te avanga kan rama a hri darh ta vak a ni, a ti bawk. Kan rama thil tha te kan ei in leh theih nan sorkar thupek zawm that kawngah tan la lehzual turin a ngen nawn lehnghal. Agriculture Development Board Vice-Chairman, Pu H. Biakzaua, MLA pawhin thuchah sawiin, Lawngtlai District mipui tan chuan ni chhinchhiahtlak tak a ni, a ti a, Covid hrileng avanga harsatna hrang hrang karah hmasawnna rahbi thar an kai thei chu lawmawm a tih thu a sawi bawk.
A.H.&Veterinary Department Director Dr. H Laltlanmawia'n technical report a pek atanga a lan danin District Vety Hospital sak nan hian NABARD RIDF 23 atangin kum 2017-2018 Financial Year chhung khan cheng nuai 90 hmuh a ni a, AIE Construction, Tuikhuahtlang Aizawl ten a sak hna an thawk a ni.
Hospital Building hian Square Feet 1464 a awh a, Operation Theatre te, Vaccination Room, Recovery Room, CVO Room leh Staff Room te a awm a ni. District Vety Hospital hawnna inkhawm hi AH& Vety Secretary Pi Lalzarmawii, IAS in a kaihruai a, District AH&Vety Officer Dr. Thanseia Chhangte in lawmthu sawiin, programme tihtawp a ni. Dr. Beichhua hian Lawngtlai a cham chhungin a department enkawl, Excise & Narcotics Department Station tlawh nghalin, thawktute nen inkawmhona hun an hmang bawk. Excise Station a hun a hman zawh hnuah Eklavya Model Residential School, Lawngtlai Chawnhu ah a tlawh bawk a, thawktute nen inkawmhona hun an hmang bawk.
