Animal Husbandry & Veterinary Minister Dr. K. Beichhua chuan ni 23, August, 2022 khan Tanhril ranchaw siamna hmunpuiah bâwng vulhtute hnenah ranchaw herna khawl a semchhuak.

Dr. K. Beichhua chuan Vety Department chu hruaitu hmasate khan hmathlir thui tak neiin, Mizoram khawi hmunah pawh District leh Block levelah hmunhma tha leh zau tak an lo hauh vek a, vision thui tak nen department hi an lo kaihruai a ni tih a langchiang hle a ni, a ti. 

Dr Beichhua chuan Department in African Swine Fever avangin hun thim tak kan hmachhawn mek tih sawiin, hemi avang hian vawkvulhte pawh beidawng lo tur leh he hun hi a la liam thuai dawn a ni tih hriaa vawksaa kan intodelh theih nan theihtawp chhuah zel turin a chah nghal bawk. Hun khirh tak karah AH&Vety Minister chuan District Veterinary Hospital 7 an hawng tawh tih tarlangin, District thar pathumah sak leh tumin hmalakna chak takin a kal mek tih a tarlang bawk. 

Tanhril-a ranchaw siamna atangin ni khatah ranchaw quintal 80 vel an herchhuak thei tih sawiin, hemi atan hian Vaimim an leisak thei reng tih Minister chuan a tarlang bawk. 

AH&Vety Department chuan vawiin Tanhril-a ranchaw siamna hmunpuiah hian Bâwng vulhtute hnenah ranchaw sawngbawl dan zirtirna, training a pe a, training a tel bawngvulhtu mi 10 hnenah ranchaw herna khawl leh ranchaw upna zém litre 20 dawng pahnih an prle nghal. Vawiina training telte hian thilpek an dawng dawn tih an hre lawk lova, ranvulh lama tui mi tak tak an ni tih Resource Person Dr.V Lalzarzova, Asst Director (Feed & Fodder) chuan a sawi. 

Ranchaw herna khawl hi Mizopa siam niin, Zuia research foundation siam a ni a, pakhat hi Cheng 56000 man a ni. Ranchaw herna khawl semchhuah inkhawm hi Dr Lalrinpuii Sailo, Director AH&Vety in a kaihruai a ni.