Animal Husbandry & Veterinary Minister Dr. K. Beichhua chuan vawiin khan Khatla AH&Vety Complex-ah Epidemiological Center a hawng.
Epidemiological Center hi Molecular Laboratory niin, ran leh mihring inkaichhawn theih natna chi hrang hrang leh ran natna hrileng thei chi hrang hrang te zirchiana, a lo inven lawk dante zirna hmun a ni.
Dr Beichhua chuan Vety Department in Epidemiological Centre a nei thei tur chu lawmawm a tih thu sawiin, Vety department officer leh staff te thawhrimna lawmawm a tih thu a sawi. Dr Beichhua chuan gas leh thildangah kan intodelh thei lo chu hriatthiam awm a tih rualin sa hrisela kan intodelh thei rih lo chu tlawmthlak a tih thu sawiin, Department leh mipui pawhin hemi kawngah mawhphurhna sang tak kan nei a ni, tih hriatnawn fo a pawimawh thu a sawi. Ran natna hrileng avanga rampawn leh state dang atanga ran lakluh khap chungchang mi tam takin a sel thin chu mak a tih thu sawiin, Mizoram ei leh barah ran vulh chu thil pawimawh tak a ni tih sawiin, vawiina lehkhathiam tam tak kan neih chhante hi an nu leh pa ten vawk, ar, bawng leh ran dangte an vulh rah a ni, a ti a, chuvangin ran lakluh khapna chu Vety department tan a nih loh thu leh Mizoram mipui tana khap an ni tih hriatchian a pawimawh thu a sawi bawk.
Dr Beichhua chuan ran leh mihring hriselna chu thil kalkawp a ni tih sawiin, ran atanga mihringin a kaichhawn theih natna tam tak a awm a, Health department thiltum chu damlote damdawi-in changkang taka enkawl ni lovin, damloh natna lak atanga venhim a ni a, chuvangin hetiang lak atanga mipuite kan him theih nan Vety department leh Health department chu thawk dun tlat tur a ni tih sawiin, mihring hriselna atan Vety department pawimawhna a nep bik chuang lo a ti.
SEDP AH&Veterinary Board Vice-Chairman Pu C. Lalmuanpuia, MLA pawhin thu sawiin, Vety department in laboratory changkang tak an nei ta chu lawmawm a tih thu leh COVID hrileng chhunga ran chaw leh sa thianghlim ei tura mipuiin harsatna an neih lohna atana AH&Veterinary department hmalakna chu lawmawm a tih thu a sawi bawk a, SEDP hlawhtling taka kalpui a duh thu leh chumi atana theihtawp chhuah zel turin department official te a chah nghal.
AH& Vety department, Joint Director (Livestock Health) in Technical report a pek atanga a lan danin, Epidemiological Center sakna atan hian kum 2016 khan NABARD Rural Infrastructure Development Fund atangin Rs cheng nuai 304.95 hmuh a ni a, state sorkarin Rs cheng nuai 16.05 thawhbelhin, a vaiin cheng nuai 321.00 senga sak a ni a, heng atang hian laboratory a hman tur khawl hrang hrang lei a ni tel bawk.
Center hawnna inkhawm Vety Polyclinic Hospital, conference hall a neih hi AH&Veterinary Secretary Lalzarmawii, IAS in a kaihruaia, Director Dr. H. Laltlanmawia'n lawmthu sawiin programme tihtawp a ni.
