Animal Husbandry & Veterinary Department Minister Dr. K. Beichhua chuan ni 3, June 2022 khan Kolasib District Veterinary Hospital a hawng. 

Vety Minister Dr K. Beichhua chuan Kolasib District Vety Hospital an hawng thei ta chu lawmawm a tih thu sawiin, hrileng avanga hun khirh tak karah State Sorkar chuan theihtawp a chhuah a, hetianga Hospital hawn theih a ni ta hi, Pathian hruaina vang chauh a ni, a ti. Dr Beichhua chuan ran enkawl kawngah kan thangharh chho mek tih sawiin, mihring leh ran chu inthlunzawm tlat an nih avangin mihring hriselna atan kan ran vulh leh a enkawltute kan hrisel tawn a pawimawh a ni, a ti. Hei vang hian Veterinary Science hlutna a sang chho zel a ni, a ti. 

AH& Veterinary Board Vice-chairman Pu C. Lalmuanpuia, MLA pawhin thuchah sawiin Kolasib Veterinary Hospital hawn theih a ni ta chu lawmawm a tih thu leh district mipuiin tangkai taka an chhawr a beisei thu a sawi. 

Kolasib District Veterinary Hospital hi NABARD-RIDF XXIV atanga sak niin, a sak nan cheng nuai 150 ruahman a ni a, LK Siama, Kolasib in a sak hna a thawk. October 2019 ah sak tan niin, a dung feet 75 leh a vang feet 39-a zau a ni. 

Hawnna inkhawm hi AH&Vety Secretary Pi Lalzarmawii, IAS  in a kaihruai a, Hmarveng Bialtu Pastor, Laldintluanga'n tawngtaina hun a hmang a, AH & Vety Director Dr Lalremliana'n technical report a pe a, District Veterinary Officer Kolasib Dr Engkunga Chhangte in lawmthu sawiin hun hman tihtawp a ni.