Animal Husbandry & Veterinary Department chuan ni 20, April, 2020 khan Minister Dr. K. Beichhua hovin a office chamber-ah COVID-19 Lockdown neih chhunga department hmalakna hrang hrang a thlirho.
Meeting chuan hmarchhak state pahnih- Assam leh Arunachal Pradesh-a vawk pul hri, African Swine Fever (ASF) leng mek chungchangah ICAR-National Research Centre on Pig Rani, Guwahati atanga thurawn a hmuh angin ramchhung leh rampawn atanga vawk lakluh khapna, prohibition order dinglai chu chak taka kalpui ni se tiin a rel a, Lockdown neih avanga Mizoramin ei leh bara harsatna a tawh theih lak ata invenna atan district hrang hranga vety department ranchaw chinna hmunah a tam thei anga vaimim chin vek ni se tiin a rel bawk. Meeting-ah hian AH & Vety, Fishery & Sericulture Board Vice-Chairman C Lalmuanpuia, MLA, AH & Vety Department Secretary C Lalpeksanga, Director Dr. Hmarkunga leh official dangte an tel.
United Kingdom (UK) atanga vawk chi tha lakluh chungchangah AH & Vety Minister Dr. Beichhua chuan Union Minister for Animal Husbandry, Dairying & Fisheries Giriraj Singh chu telephone-a a biak thu tarlangin Lockdown avanga Delhi atanga Mizoram-a lakluh dan turah harsatna awmte leh phalna neih ngaite chu Union Minister chuan a rawn tihfelsak tur thu a tarlang bawk. AH & Vety Department chuan UK atangin vawk chi tha 45 a lalut tawh a, heng vawk te hi Delhi quarantine centre-ah hun rei tak khung hran niin, an hriselna te pawh endik vek tawh a ni.
Lockdown neih chhunga tunhnaia Mizoram khawchhak lama, chhinghne rualin an sial vulhte a sehhlum sak chungchangah meeting chuan a ven dan turah a rang lama ruahmanna siam nise tiin a rel bawk.
Lockdown neih chhunga sa leh ranchaw supply bakah Animal Healthcare chungchunga AH & Veterinary Department hmalakna chu meeting chuan lungawithlak a tih thu tarlangin, hemi kawnga department hmachhawpte leh kal zel dan turte sawiho nghal a ni.
