Animal Husbandry & Veterinary Department Minister Dr. K. Beichhua chuan ni 29, March, 2022 khan Siaha District Veterinary Hospital a hawng.
Vety Minister Dr K. Beichhua chuan Siaha District Vety Hospital an hawng thei ta hi Siaha tan ni chhinchhiah tlak a ni, a ti a, thil ropui tak ni lo mahse Siaha District mipui ten tangkai taka an hman theih nan duhsakna a hlan nghal. Dr. Beichhua chuan heng Hospital thate hi mipui ta a ni a, a neitu nihna rilru kan put thiam a pawimawh hle a ni, a ti.
African Swine Fever, vawk pul hrileng chu a ziaawm tawh dawn emaw kan tih lai in Sakawrdai leh Champhai lamah hmuhchhuah leh tawh a ni, tiin Dr. Beichhua chuan a sawi bawk a, he hri hi Vety Department do hneh theih a ni lo tiin, mipui kan tanrual a ngai a ni, a ti a, hri leng lakah kan la fihlim loh avangin mitin kan fimkhur a ngai a ni, a ti.
Dr Beichhua chuan Vety Department thawktute fuihna thuchah sawiin, Technical Department dang, PWD, Agriculture, Health Department te nen kan line ah thiamna inang kan ni a, kan hniam bik tur a ni lo, tih ngaihtuahna kan nei reng tur a ni, a ti.
Siaha District Veterinary Hospital hi NABARD-RIDF XXIV atanga sak niin, a sak nan cheng nuai 150 ruahman a ni a, Daniela, Siahatlah in a sak hna a thawk. October 2019 ah sak tan niin, March 2022 ah sak zawh a ni.
A building zau zawng, area hi sq. metre 259.20 a ni a, ground floor leh first floor awmin, Operation Theater, Recovery Room, Examination Room, Veterinary Officer room, staff room, computer room, store room leh toilet-te a awm a ni.
Hawnna inkhawm hi Siaha District Veterinary Officer Dr. Sahlu Khaila in a kaihruai a, ECM kohhran, Senior Executive Secretary Rev VL Ngaia Hlychho-in tawngtaina hun hmangin, AH & Vety Additional Director Dr Lalrinpuii Sailo in technical report a pe a, Veterinary Officer Siaha Dr Lalrengpuii Sailo in lawmthu sawiin hun hman tihtawp a ni.
