Animal Husbandry & Veterinary Department Minister Dr. K. Beichhua chuan June ni 10, 2022 khan Thenzawl Vety Farm-ah Sial Vulhna hmun, Mithun Stud Farm a hawng.
Dr. K. Beichhua chuan State naupang kan ni ti kumkhua bik tur kan ni lo, ram tha tak leh boruak nuam tak Pathianin min pe a, mahni kut leh kea dingchhuak turin theihtawp i chhuah ang u, a ti.
Hrileng avanga hunkhirh tak karah Sorkarin theihtawp a chhuah a, Vety Department pawhin District Veterinary Hospital 6 an hawn tawh thu leh Champhai ah pawh Hawn theih thuai a beisei thu leh district thar pathumah pawh Vety Hospital sak tan theih turin thil pawimawh leh tulte an peihfel tawh tih a sawi bawk a, vawiinah Mithun Stud Farm an hawng leh thei chu lawmawm a tih thu a sawi.
Dr. Beichhua chuan sa ei tam kan ni a, a tharchhuak tam kan ni lova, hetihlai hian thalai tam tak ranvulhah an harhthar mek tih sawiin, sa ah Mizoram intodelh nan Sorkar leh a department pawhin theihtawp a chhuah zel anga, mipui pawhin kan tihtur ti a, theihtawp kan chhuah chuan kan intodelh ngei ang tiin a sawi.
Pu C Lalmuanpuia, MLA, Vice-chairman AH&Vety and Sericulture Board pawhin thuchah sawiin, Sial chu Mizo society ah thil pawimawh tak a ni, tiin khawtlangah mi hausa tehna pakhat a nih thu leh, man leh mualah pawh sial chu Cheng 40 tlukpuia chhiar tel thin a ni, a ti. Department hmalakna chu sial sa intodelhna atan hmasawnna rahbi thar a ni, tiin a sawi bawk.
AH & Vety Director Mithun Stud Farm an hawn tak chu sorkar hmasa lama NEDP atanga hotu hmasa ten sum an ruahman Cheng vaibelchhe 3.28 atanga siam a ni tih tarlangin, sorkar a lo inthlak tak avangin, NEDP a lo tawp ta a, hun hmasa lama an ruahman aiin a project an tihtet hret thu a tarlang bawk. Dr Lalremliana chuan tunah hian sial 7, a nu 6 leh a pa 1 an dah mek tih a sawi bawk.
Sial chu ramhnuaia tla chi ni mahse bâwng angin in chhungah enkawl theih an beisei thu a sawi a, hei vang hian he project pawh hi Intensive Mithun Stud Farm an tih thu a sawi bawk. Mizoram District pali, Champhai, Serchhip, Lawngtlai leh Siaha district-a sial an vulh te chu anmahni awmna theuha inthlahpungin, sial te chu an te tulh tulh mai a, state pawn atanga a chi tha lak theih a nih loh avangin Mizoram hmun hrang hranga sial an vulhte chu he farm ah hian inthlahpawlh tira, sial chi tha leh lian zawk a rawn chhuah theih a beisei thu leh chu chu Mithun Farm an siam chhan tih a tarlang bawk.
Sial Vulhna hmun hawnna inkhawm hi AH&Vety Secretary Pi Lalzarmawii IAS in a kaihruai a, Thenzawl AH&Vety Farm-a General Manager in lawmthu sawiin programme tihtawp a ni.
