Animal Husbandry & Veterinary Minister Dr K Beichhua chuan ni 17 February, 2020 khan Khatla-a Mizoram State Veterinary Council (MSVC) Conference Hall a hawng.
Conference Hall hawnna inkhawmah Dr K Beichhua chuan thuchah sawiin, MSVC chak taka a kal zel theih nan duhsakna a hlan a, Council chakna chu AH&Vety Department chakna a ni, a ti.
Vety Minister Dr Beichhua chuan Veterinary doctor ten Mizoram chhungah ngei registration an tithei ta chu lawmawm a tih thu leh ropui a tih thu tarlangin Veterinary Doctor professional kalphung nghet taka kengkawh tlat tura a beisei thu a sawi bawk.
Dr Beichhua chuan profession dangah pawh Senior te zahna tlahniam deuh taa a hriat thu tarlangin hemi kawngah Junior zawkten zir tur an nei nia a hriat thu a sawi. AH&Vety Director Hmarkunga pawhin thu sawiin Veterinary Service chu ran tana service ni mahse a neitu mihringte hnena service petu kan ni, a ti a, doctor ten mahni profession an hriatchian a pawimawh thu a sawi.
Inkhawm hi MSVC President Dr C Sangnghina'n a kaihruai a, Dr Robert Rualthankhuma, Registrar in PowerPoint presentation hmangin Council kalphung leh hmalaknate a tarlang.
Registrar Dr Robert Rualthankhuma State Veterinary Council chu kum 1986-ah din a ni tih tarlangin, tunah hian AH& Veterinary Directorate bulah builidng neiin office staff panga (5) an nei mek tih a tarlang.
MSVC Conference Hall hi Khatla-a State Vety Council building chungah sak zawm a ni a, cheng nuai 21 senga sak a ni.
