Aizawl, the 27th October, 2026: Vawiin hian Animal Husbandry & Veterinary Department, Mizoram chuan Livestock Health & Disease Control Programme (LHDCP) - National Animal Disease Control Programme (NADCP) hnuaiah Classical Swine Fever (CSF) Vaccine pek runpui (4th Round) hawnna hun a hmang. He scheme atan hian DAHD, Govt. of India in 100% a tumsak a ni. Video Conference kaltlanga he hun hi hman niin Directorate, Aizawl-a Officers-te bakah District hrang hranga thawktu - District Officers, Veterinary Officers, Paravets, MVU Doctors & Staffs ten hun an hmangho a ni.
He hun hi NADCP Nodal Officer, Dr Rosangzuala Dy. Director (LH) in a kaihruai a, Dr K.Lalhlimpuii Joint Director(LH) in CSF Vaccination beihpui – Round Li (4) na hi a hawng a ni. Dr K.Lalhlimpui chuan thu sawiin Classical Swine Fever (CSF) vaccination Programme hi vaccine pekah a tawp mai lova, vaccine kan pek ang angte chu Bharat Pashudhan Portal-ah upload zel tur a nih thu a sawi bawk. Tin, he programme hian seromonitoring keng telin vaccine pek hma leh pek hnuah ran thisen te hi endik leh tur a nih thu a sawi a. Department-a thawktute chu vaccine vawn him leh vaccine pek chungchangah uluk taka hna kalpui zel turin a fuih a ni.
Classical Swine Fever hi vawk hri hlauhawm tak, a vei tawhte chu 80% - 100% deuhthaw thih theihna, a enkawlna damdawi mumal awm lo a ni. Invenna awmchhun chu Vaccine chauh hi a ni. Mizoramah vawk vulh hi eizawnna bulpui a nih avangin CSF hri lêng tur ven hi AH & Veterinary Department chuan a ngai pawimawh hle a ni.
AH & Veterinary Department chuan vawk vulhtu zawng zawngte chu, Veterinary Officer-te, VFA-te leh Animal Health Worker-te țawiawm tur leh an vawkten vaccine an dawn ngei theihna tura lo inring țheuh turin a ngen a, Local Council leh Village Council-te țawiawmna a ngen bawk a ni. Tin, vawk thi thut emaw natna danglam tak emaw a awm chuan rang taka Veterinary Hospital/Dispensary hnai ber a report nghal turin a ngen bawk a ni.
Programme Kalphung:
1. Vaccine, ear-tag, lirthei leh he programme beihpui thlakna senso zawng zawng hi Govt. of India in za a za(100%) a thlawnin a tum a ni.
2. ICAR-IVRI siam Live Attenuated Cell Culture Vaccine (IVRI-CSF-BS) hman a ni a, vawikhat pek hian thla 24 chhung a veng thei. He vaccine hi dose khatah Rs.2 man pawh a tling lo.
3. Mizoramah chuan he vaccine pek runpui hi kum khatah țum hnih kalpui thin a ni a, vawk thla 3 chunglam (a râi lai leh dam lo tiam lovin) zawng zawng pek theih a ni ang.
4. Vawk vaccine pek zawng zawngte Govt. of India Bharat Pashudhan Portal-ah thun luh zêl tur a ni a, ICAR-NIVEDI, Bengaluru in a vil zui ang.
5. India ram puma vawk zaa 47 vel awmna North-East State-te ngaihpawimawh bik an ni.
