Vawiin Dt. 28th September, 2026 hian A.H & Veterinary Department, Mizoram State Veterinary Council (MSVC) leh Indian Veterinary Association (IVA), Mizoram tangkawp chuan 'World Rabies Day, 2026' chu Bible Society of India Hall, Khatla, Aizawl-ah an hmang. He hunah hian AH & Veterinary Department changtu Minister zahawm tak Pu C.Lalsawivunga chu khuallian niin Pu Lalsangliana, MCS, Secy. to Govt. of Mizoram, AH & Veterinary Department chu khualzahawm a ni. He hunah hian World Rabies Day puala State Level Essay Writing Competition, lawmman sem nghal a ni a. Dr Lallawmzuali Ralte, Associate Professor, CVSc & AH, Selesih hnen atangin kumin thupui ‘Stronger Together’ tih chu ngaihthlak a ni bawk.
Minister chuan thusawiin Veterinary department leh mihring enkawltu Health department -te hian tha taka thawhhona hnuaiah Rabies umbona beihpui hi kan kalpui a ngai a, nasa lehzuala thawkho tur kan ni a ti. Tin, he hna kan kalpuinaah hian mahni department tan maia thawk ni lovin mipui tana thawk zel tur kan ni a ti bawk. Rabies natna hi ui/zawhte atanga kai theih a nih avangin Ui/zawhte vulhtuten fai leh thianghlim taka kan enkawl a pawimawh a, a hun taka vaccine kan pek a ngai a ni. Ui/Zawhtein mi a seh palhin thutaka lak thin tur a ni a, mithiamte hnenah kalin an thurawn lak vat zel tur a ni a ti. Rabies chungchangah hian Veterinary department leh Health department te chu nasa lehzuala Awareness kalpui turin a chah a ni.
Vawiina hun hman mek hian mimal/khawtlang/ ran vulhtute tan rah tha chhuah ngei se a duhthu a sawi bawk a ni.
Khuallian thusawi zawhah hian Khualzahawm Pu Lalsangliana, MCS, Secretary, AH&Vety hnen atangin thusawi ngaihthlak a ni bawk.
Global Alliance for Rabies Control (GARC), USA hmalaknain World Rabies Day hi kum 2007 atangin hman tan a ni a. Kum tinin September ni 28 ah thupui (theme) thlan bik neiin khawvel pum huapa hman thin a ni. Kumin, 2026-a World Rabies Day thupui ‘Stronger Together’ pawh hian a tum ber chu Rabies natna nuaibo leh tirem turin mipuite kan tanrual a ngai a, thawhhona tha kan neih phawt chuan he natna tihbaiawm leh hlauhawm tak hi khawvel ata kan tibo thei dawn tih a ni. A bik takin Mihring leh Ran hriselna lama thawktute inkarah Rabies nuaibo tura thawhhona tha zawk neih tulzia tarlan hi a tum a ni a. Thawhhona tha kan neih chuan, rabies nuai bona kawngah chak zawka hmalak theih a ni ang a, tin, rabies natna zirchianna leh reporting system chungchangahte, mipui zirtir chungchangahte leh policy siam chungchangahte hmasawnna a thlen ngei beisei a ni. Ui a hri nuaibo tur hian mitinte hian mawhphurhna kan nei a ni.
World Rabies Day, 2026 denchhen hian Dt. 26/09/2026 khan Aizawl veng hrang hrang pali (4), Zemabawk, Salem Veng, Ramrikawn leh Phunchawng-ahte hian a thlawnin Anti-Rabies vaccine pek a ni a. He hunah hian Ui leh Zawhte 407 (Ui 385; Zawhte 49) lai mai chu a thlawna vaccine pek a ni.
Tin, World Rabies Day pual hian, State Level Essay Writing Competition buatsaih a ni bawk a. Category pahnih – Junior Category leh Senior Category -ah then niin Junior Category hi Mizoram-a Higher Secondary School leh a hnuai lam zirlaite tan a ni a, Senior Category hi Mizo Veterinary Students leh MSVC hnuaia Registered Mizo Veterinarians-te tana buatsaih a ni. Junior Category-te tana Essay Topic hi “Rabies (Ui a hri) nuai bo tura mitinte mawhphurhna’ tih a ni a, Senior Category-te tan “Breaking Barriers to Zero by 2030: Leveraging Veterinary Science and One Health to Eliminate Rabies” tih a ni thung. Junior category ah hian Mizoram hmun hrang hrang atangin zirlai 45 an tel a, Senior category ah hian mi 12 an tel bawk a ni.
State Level Essay Writing Competition lawmman dawngtute chu a hnuaia mite hi an ni a, lawmman hian Merit Certificate leh Sumfai a keng tel a ni.
A. JUNIOR CATEGORY:
Pakhatna - Lalmawipuia, class X, Kids Care School, Ramhlun South, Aizawl
Pahnihna – Elizabeth C.Lalruafeli, class IX, St.Paul’s Higher SecondarySchool
Pathumna – F.Vanlalmuanpuii, Class X, Govt. Hnahthial High School
Consolation Prize –
1. Lalrinfeli, Class XI, Govt. Mamit Higher Secondary School
2. Lalngaihsaki, Class XII, Govt. Republic Higher Secondary School
3. Bethsy Lalthanmawii, class IX, Govt. High School,Samlukhai
4. Jonathan Lalhriathlua, class X, Govt. Blue Mountain High School, Sangau
5. Joseph Vanlalnunpuia, class XI, CLS Academy
B. SENIOR CATEGORY:
Pakhatna – Dr Lalmuansangi, Chawnpui, Aizawl
Pahnihna – Dr Blessa Sailo, ICAR, Kolasib
Pathumna – Dr Freddy H.Siamthara, Kanan Veng, Aizawl.
Consolation Prize –
1. Dr Theresa Zochampuii, Venghlui,Aizawl
2. Dr C.Lalrinmawia, Mission Vengthlang, Aizawl
3. Dr C.Lalventluanga, Durtlang, Aizawl
4. C.Lalchhanpuia, Venghlui, Aizawl
5. Dr Rotluangkimi, Kawnveng, Bilkhawthlir.
India ram hi ui a hri (Rabies) in a chenchilh ram a ni a, khawvel pum huapa Ui seh atanga Ui a hri (rabies) thihpui zaa 36 lai mai hi India rama thleng a ni. He natna tihbaiawm tak mai hi virus chikhat, ‘Lyssa virus’- in a thlen a ni a, a kai tawhte chu enkawl dam theih loh hiala ngaih a ni thin. Khawvel ram hrang hrang 150 chuangah he natna hi kum tinin mi 59,000 laiin an thihpui thin nia report a ni a, heng zinga zaa 95 hi Asia leh Africa ram atang report a ni.
Word Health Organization (WHO) hian Rabies umbo tumin nasa takin hma a la a. Kum 2030 hian khawvel ram hrang hrangah Rabies natna hi umbo ni se tih hi a tum ber a ni bawk. India sawrkar pawhin nasa takin tan a la a, kum 2018 khan National Action Plan for Dog Mediated Rabies Elimination (NAPRE) dinin Rabies umbo tur hian State hrang hrang tan hmachhawpte a siamsak thin a ni. Mzoram bikah pawh Rabies natna umbo a nih theih nan hian Ran hriselna lama mawhphurhna changtu AH & Veterinary Department, Mizoram State Veterinary Council (MSVC) leh Indian Veterinary Association (IVA)-te hian theihtawpin tan an la thin a, Anti rabies vaccination camp-te leh inzirtirna (awareness) te neiin kum tinin hmun hrang hrangah an che chhuak thin a ni.
