September ni 28 kha World Rabies Day a ni a; Kum 2007 aṭang khân kumtinin khawvel ram hrang hrangah he ni pual hian hun hman a ni ṭhin a; Ui a hri danna/ Rabies Vaccine hmasa ber siamchhuaktu Scientist, Louis Pasteur thih cham a ni bawk a ni.
Kumina World Rabies day thupui chu, Inlungruala thawh hova hri danna hmanga Ui a hri nuaibo tih a ni. Ui a hri hlauhawmna leh fimkhurna thute leh he hri dona kawnga hmasawnna leh inzirtirna thute puanzar thar a ni ṭhin a ni. Ui a hri avang hian khawvel pumah kum tin mi sing ruk vel an thi ṭhin a; minute 10 dan zelah mi pakhat thi ziah ang an ni.
Mihringin he natna a kaina hnar ber chu ui seh aṭangin a ni. Chuvangin natna te hi mihringah ngawt do hneh chi a nih loh avangin thawhhohna ṭha a ngai tih hriain W.H.O, F.A.O leh World Organisation for Animal Health (OIE) te, India ramah chuan Animal Husbandry leh Ministry of Health te One Health programme atan thawkhovin Ui a hri dona kawnga hmalak dan tur, Strategic Action Plan an duang mek a. Kum 2030-ah chuan khawvel aṭanga ui a hri nuaibo a, he hri avanga thihna pawh tihtawp tum a ni.
Aizawlah pawh AH&Vety Deptt huaihawtin World Rabies Day programme hi Veterinary Polyclinic Hospital, Khatla ah hman a ni a.Dr Hmarkunga, Director, AH&Vety in kaihruaiin, Dr Lalhmingthanga, Jt.Director(Livestock Health) in keynote address a pe a; Deptt official-te leh ui neitute bakah People for Animal Protection Society hruaitute pawh he hunah hian an tel a ni.Tin, he Programme hi District hrang hrang a Veterinary Hospital ah te an hmang bawk a ni.
World Rabies Day denchhen hian kar khat chhung September ni 28,2020 aṭanga October ni 3,2020 thleng Veterinary Polyclinic Hospital, Aizawlah leh District tina Veterinary Hospital-ah te man chawi lovin Rabies vaccine hi chiu tir theih a ni.
World Rabies Day pual hian Aizawl khawpui chhunga Private Veterinary Clinic hrang hrang ah man chawi lovin ui engemaw zat chiu a ni.
