Ni 2-4 May 2024 khan Dr Lipi Sariwal, Deputy Commissioner, National Livestock Mission, Government of India chuan NLM hnuaia vawkvulh tanpuina pekchhuah chungchangah hmalaknate a hmuna en turin Mizoram a rawn tlawh.

Deputy Commissioner hian NLM hnuaia Entrepreneur-te Farm Lengpui leh Dihmunzawl amite a hmunah a en a, Entrepreneur-te hmalakna chu fakin NLM in a tum ber chu ran chi tha chhawm nun leh tihdarh zel a nih thu sawiin Farm a tlawhnaten hma tha taka an lak bakah loan leh subsidy-te dik taka an hman avangin lawmthu a sawi a. Heng Farm neituten an Farm an tih changtlun zel dan turte pawh a sawipui nghal a ni.

AH & Vety Department  hotute nen inkawmin Deputy Commissioner chuan NLM hmalaknate Department-in theihtawp chhuaha an kalpui avangin lawmthu a sawi a, a tam thei ang berin he hamthatna hi an dawn theih ngei a duh bakah darh zau zawka NLM chungchanga hma lak sak turin a chah a, Entrepreneur-te tana training buatsaihte leh tha zawka farm an enkawl dan tur te an sawi ho. 

Heng vawkvulh lama tanpuina dawngtute nen hian meeting an nei nghal bawk a, Meeting-ah hian Entrepreneurs mi 40 vel kalin, an harsatnate an sawipui a, an harsatna lian ber Mizorama ran chaw man sang lutuk chu a tihziaawm dan tur Central lam hotute a lo sawipui tur thu a tiam a ni.

National Livestock Mission hnuaiah hian Piggery, Poultry leh Goatary-ah te tanpuina loan leh subsidy pek chhuah reng a ni a, tun dinhmunah diltu mi 174 awm tawh in, Mi 30 hnenah 1st installment subsidy pekchhuah tawh a ni. Hemi chungchang  hrechiang duh chuan Directorate, AH & Vety Department, Khatlaah Office chhungin a zawhfiah theih reng ani.