Ni 27 February dar 10am khan State Veterinary polyclinic Hospital conference hall,Khatlaah “One day training on Meat processing and value addition technologies relevant to North-Eastern India” chu AH & Veterinary Department,Government of Mizoram leh ICAR-NMRI,Hyderabad tangkawpin an buatsaih.
He hun hi Dr Lalfamkima Deputy Director (VE&E) chuan a kaihruaia,Resource person Dr Suresh K Devatkal Principal scientist ICAR-NRMI,Hyderabad ,Dr C.Lalnunpuia V.O,Durtlang leh Dr Lalrengpuii Sailo Manager,AH&Vety Farm Selesih ten zirtirna an pe. Trainingah hian India hmarchhaka Ar leh vawk vulh eizawnna tlak a nih zia te, awmze nei zawk a Sa sawngbawl dan leh dahthat dan chi hrang hrang te, Meat processing India hmarchhak ten kan hlawkpui ve theih dan tur te leh Thianghlim taka ran talh dan te, Sa atanga eitur tuihnai tak tak siam dan te sa dahthat dan te zirtir a ni.
India Hmarchhak hi India ramah vawksa ei tam ber kan ni a, vawksa kan mamawh ang kan la tharchhuah zawh loh avangin state dang leh ram dang atangin kan chawlut nasa hle a. Hei hian vawk vulh hi eizawnna tha leh ngialnghet a nih zia a tarlang. Vawk vulh hi hlawk zawk leh eizawnna atan a hmang tur chuan vawk chi tha vulh te, Vawk in awmna hmun tur thlan thiam te, vawk vulh tur thlan thiam te, a enkawl dan thiam te, an taksa mamawh ang chaw tha pek te, an hriselna ngaih pawimawh leh hri danna pek that te a ni a, Sa thianghlim chauh kan ei thei nan ranvulhtu ten ran hrisel tha chauh kan hralh thin tur a ni. Tin, ran talhtute pawh in ran kan talh dan ah te, a sa kan sawngbawl dan ah te, kan talhna hmun leh hmanrua kan hman te tun ai a alo thianghlim theih nan hmasawnna tur tam tak kan nei dan te in zirtir a ni a, hemi chungchangah hian sawi hona tha tak neih a ni.
He trainingah hian mi 31 an tel a, PIGFED member vawk vulh tu mi 15 leh Chhimphei Womens Poultry producers company limited member mi 16 an tel a ni.
Training kharna hun Dr. Lalrotluanga Sailo, Director, Animal Husbandry & Veterinary Department chuan a hmanpuia, training a kal te hnenah certificate leh ran damdawite sem a ni bawk.
Issued by
Information wing
Animal Husbandry & Veterinary Department
Government of Mizoram
