Ni 24 August, 2024, 2 PM khan AH & Vety Department Minister Pu C. Lalsawivunga chuan All Mizo Veterinary Medical Students' Association (AMVMSA) Golden Jubilee lawmna hun College of Veterinary Sciences & Animal Husbandry (CVSc&A.H) Auditorium, Selesih-a hman chu khuallian niin a hmanpuia,Jubilee puala Souvenir buatsaih a tlangzarh bawk. He hunah hian Dr. C. Lalrintluanga, Director, A.H & Vety. Department chu khualzahawm a ni. 

Minister chuan Veterinary Doctor zirlai intelkhawm AMVMSA in kum 50-na hmel a hmu chu a lawmpui thu sawiin, an thlen chinah duh tawk mai lova tun aia hmasawnna nasa zawk thlen thei tura theihtawp chhuaha lehkha zir turin member-te a fuih a. Hnam dang leh sakhaw dang betute zinga khawsa an nih avangin nun uluk tur leh hnam ziarang pho chhuah kawngah pawh theihtawp chhuah turin a chah a. AH & Vety. Department hmasawnna tur leh zirlaite hmakhua ngaia hmalak a nih thu sawiin, Sawrkarin Vety. Doctor 10 leh VFA 9 a la dawn a, mamawh dangte pawh ngaihtuah zui zel tum a ni, a ti a. Vawk hrileng ASF beihlet kawnga Department thawktute inpekna fakawm a tih thu sawiin, State pawn leh ram dang atanga vawk, vawksa leh vawksa atanga thil siamte khap mek a ni a, sawrkar laipuiah hripui leng avanga harsatna thleng chhawmdawlna tur project thehluh a nih thu leh theihtawp chhuaha umzui zel a nih thu a sawi bawk. 

Sa, artui leh bawnghnute-a intodelh tura hmalak a tul thu leh nasa zawka ngaihtuahna sen tlan a tul thu sawiin, zirlaite chu ram tana hmathlir neia chumi hawi zawnga lehkha zir turin a fuih a. Kalkhawmte chu dikna, taimakna, rinawmna leh thawhrimna nena hna thawk turin a chah a. Project hluihlawn avanga sawrkarin sum leh pai leh tha tam tak a sengral thin chu pawi a tih thu sawiin, Bana Kaih policy hnuaiah erawh project chhawrnahawm, hlawhtling tura ngaihte leh a ti tak takte chauh puih tum a ni, a ti a. AH & Vety. Department hnuaia hmalaknate chu mipuite nitin ei leh bar innghahna a nih avangin khawtlang nun leh sum dinhmun chawikan kawnga theihtawp chhuahpuiah Veterinarian-te a sawm nghal bawk. 

A.H & Vety. Director Dr. C. Lalrintluanga chuan AMVMSA Golden Jubilee lawmna buatsaih chuan Veterinarian-te tan hmasawnna thlen se a duh thu sawiin, AH&Vety. tihhmasawnna kawngah tanrualna tha zawk siamin rah tha a chhuah ngei a beisei thu a sawi a. ASF hrileng laka hmalak kawngah Minister hovin theihtawp chhuah a nih thu leh Line Department dangte nen lungrual taka hmalak a nih thu sawiin Department hmasawnna thlen tura infinchhuah tawn a pawimawh thu a sawi bawk. 

He hun hi Tv C. Lalhlimpuia, President, AMVMSA  Gen. Hqrs. Khanapara, Assam chuan kaihruaiin  Rev Gospel Thanmawia'n hunserh a hmang a. Dr. V. Lalzarzova, Chairman, Jubilee Advisory Board-in inlawmna thu a sawi a. Nl Lalrawngbawli, Jubilee Executive Secretary-in report a pe a, Dr. C. Sangnghina, Founder, AMVMSA leh Dr. Robert Rualthankhuma, President, MVSA & IVA Mizoram te hnen atangin thusawi ngaihthlak a ni a. Tv KM Laltanpuia, President, AMVMSA Sub-Hqrs. Jalukie, Nagaland-in lawmthu sawiin hun hman a khar a ni. 

AMVMSA Golden Jubilee hi 'Socio-Economic Development through Animal Husbandry in Mizoram' tih thupui hmanga lawm a ni a.Chawhma dar 10:30 atang khan Golden Jubilee lawmna hun hman tan niin, he hun hi Tv C. Lalhunhlua, President, AMVMSA Sub-Hqrs. Selesih chuan kaihruaiin Tv C. Lalhlimpuia, President, AMVMSA Gen Hqrs. Khanapara-in a hawnna thuchah a sawi a. Member lo ni tawh boraltate sunna hun hman a ni a. Dr. Lalremliana, President, Mizoram State Veterinary Council leh Dr. Lalnuntluangi Hmar, Dean, CVSc & A.H Selesih te hnen atangin thusawi ngaihthlak a ni. 

All Mizo Veterinary Medical Students' Association (AMVMSA) hi October ni 25, 1974 khan din niin, thupui atan 'To Empower And Encourage Fellow Veterinarians' tih an hmang a ni. General Hqrs. College of Veterinary Sciences & Animal Husbandry, Assam Agricultural University, Khanapara, Guwahati hnuaiah Sub-Hqrs. 2, College of Veterinary Sciences & Animal Husbandry, Central Agriculture University, Selesih, Mizoram leh College of Veterinary Sciences & Animal Husbandry, Central Agriculture University, Jalukie, Nagaland te a awm mek a ni.

AMVMSA hian tun dinhmunah active member 118 nei mekin, heng zinga 83 te hi CVSc & A.H Selesih, Mizorama zirlaite niin, CVSc & A.H Khanapara, Assam-a zirlai 17 leh CVSc & A.H Jalukie, Nagaland-a zirlai 18 te an awm bawk. Tunhma member lo ni tawhte chhiar telin AMVMSA ah hian member 480 vel an awm tling tawh a ni.