Dated Aizawl, 25th May, 2026 : Vawiin chawhma dar 10am khan Pu Rajiv Ranjan Singh alias Lalan Singh Union Minister of Fisheries, Animal Husbandry and Dairying kaihhruaiin hmarchhak state te chuan High Court Hall, MINECO-ah hmarchhak state-te hmalakna leh sawrkar laipui hnuaia scheme hrang hrang hman tangkai dante thlir hona Regional Review Meeting an nei. He hunah hian Pu George Kurian Minister of State for Fisheries, Animal Husbandry and Dairying(FAH&D), hmarchhak state tin atangin Fisheries, Animal Husbandry and Dairying changtu Minister-te, National Dairy Development Board(NDDB) Chairman Pu Meenesh Shah, National Fisheries Development Board(NFDB) hotute bakah Central leh State official pawimawh mi engemawzat an tel bawk a ni.
Minister Pu Rajiv Ranjan Singh chuan lawmthu sawiin, PM Modi-a’n hmarchhak bial hmasawnna tura vision a neih chu tarlangin, a puitlin theih nan Central Sawrkar chuan theihtawp a chhuah dawn thu a sawi. Sangha khawi, Ran vulh leh Bawnghnute thar lama hmasawnna hian hmarchhak bialah economic development tha tak a thlen theih thu sawiin India rama Integrated Aquapark hmasa ber Ziro, Arunachal Pradesh-a hawnnaa a tel thei chu lawmawm a tih thu sawiin, Integrated Aquapark dang 11 din tura ruahman zinga 4 chu hmarchhak biala din a nih dawn thu a sawi a. Minister chuan Mizoram pawh hetiang hmun din nan hian Detailed Project Report leh a hmun tur rawn siam turin a sawm bawk a ni. Pu Rajiv-a chuan sawrkar laipuiin Mizoram sawrkarin Fish Marketing Center cheng vaibelchhe 50 senga din tura ngenna a lo thehluh chu an pawm thu a puang bawk. Minister chuan Hmarchhak biala Mission Amrit Sarovar atan cheng vaibelchhe 200-300 dah an inhuam thu a sawi a, fur zawh hnuah NDDB, NFDB leh Central hotu dangte chu hmarchhak state hrang hrang tlawh chhuak a, an mamawh leh theihnate hmuhpui turin a nawr dawn tih a tiam bawk.
Ran vulh chungchangah Minister chuan hmarchhak state-te chuan Bawnghnute thar chhuahah zaa 37, Artui thar chhuahah zaa 40 leh Sa thar chhuahah zaa 15 in hmasawnna a awm thu a sawi a, Minister chuan hmarchhak state-te chu hmasawnna nasa zawk hmu zel tura tan la turin a fuih a ni. Minister chuan hmarchhaka khaw tinah Cooperative society-te chawisan a ngaihpawimawh thu leh Artificial Insemination, Infrastructure Development, Technology din leh mihring thiamna tihsan a ngaih thu a sawi bawk a. Ran hri leng thin chungchang sawiin, Minister chuan sawrkar laipui chuan heng natna laka invenna vaccine-te siam chhuak turin theihtawp a chhuah reng thu a sawi a. Hemi bakah hian Guwahati-ah NDDB Regional Office din tum a nih thu a sawi bawk.
Union Minister chuan Sangha khawi, Ran vulh leh Bawnghnute thar chhuah kawngah hmarchhak state-te chu mahni khamkhawp thar thei tura ruahmanna neih a nih thu sawiin, State minister-te leh official dangte chu sawrkar laipui nen thawk ho a, Schemes hrang hrang kalpui dan endik a, tihdan tha ber berte hmang a hmalakna hrang hrangte a hun taka tihpuitlin a nih theih nan hma la turin a sawm.
Minister of State Pu George Kurian pawhin thu sawiin, Fisheries, Animal Husbandry and Dairying Ministry chu hmarchhak mipuiten an eikhawp an hmuh theihna atan te, Hmeichhiate dawmkanna atan te leh Entrepreneurship atan tea thawktu a ni, a ti a. Hmarchhak state-te chu intodelh tura fuihin an state tharchhuahte chawilar lehzual turin a sawm bawk.
Pu Naresh Pal Gangwar Department of Animal Husbandry & Dairying Secretary pawhin thu sawiin, hmarchhak state-te intodelhna tura tanpui chu sawrkar laipui chuan a inhuam em em thu a sawi a. State tin te chu thahnemngai taka thawk tur leh sawrkar scheme hrang hrangte hlawhtlinna chu anmahniah a innghah thuizia hre turin a chah.
Dr. Abhilaksh Likhi Department of Fisheries Secretary pawhin hmarchhak state-te chu thil thawnchhuahna hmunpui ni thei tura thuamchak zel tum a nih thu a sawi a. An mamawh apiangte inthlahrung lo a sawrkar laipui hnena thlen turin a sawm bawk a ni.
He hunah hian Hmarchhak state tin atangin Fisheries, Animal Husbandry and Dairying changtu Minister-ten an state theuha an dinhmun te, an mutanna te leh an hmachhawp te an sawi bawk a. Hmarchhak bial anga harsatna an tawhte an sawi bawk. Thalaite thuamchak te, Cold chain storage neih te, Khawl thluaknei hman tangkai lehzual te, Rotling thil siam te, a hun taka pawisa pekchhuah te chu pawimawh an tih thu an sawi a ni.
He hunah hian GAD Mizoram Principal Secretary leh Chief Secretary(i/c) ni bawk Pu Sudhir Kumar chuan kalkhawmte a lo lawm a. Fisheries Joint Secretary Pu Sagar Mehra chuan 'NER Vision 2030' tarlangin Dept. of Fisheries hnuaia Scheme-te leh Program hrang hrangte PowerPoint Presentation hmangin a sawifiah a. NDDB Chairman Pu Meenesh Shah-an North East Region-a Dairy Development lama hmachhawp awm te kalkhawmte a hrilhfiah a. Dept. of Animal Husbandry and Dairying Additional Secretary Pi Varsha Joshi-in Animal Husbandry huam chhunga hmalakna awm mek te leh hmachhawp awm te a sawi bawk a ni.
Multipurpose Dairy Cooperative Societies(MDCS) huam chin zauh tura baseline village level survey te, African Swine Fever chungchang film te, Vawk vulh dan inzirtirna lehkhabu te leh hmarchhak state-te tana scheme leh project hrang hrangte Union Minister chuan a tlangzarh a. NFDB Chief Executive Pu Bijay Kumar Behera chuan lawmthu sawiin he hun hi a khar a ni.
