February ni 18, 2025 khan AH & Veterinary Minister Pu C. Lalsawivunga chuan Selesih A.H & Vety Farm ah Durtlang leh Sihphir a bawng vulhtu 41 hnenah a thlawn in hay bawngchaw atan a semchhuak. Minister chuan thu sawiin, bawnghnute, artui leh sa a intodelh tur chuan ran chaw atanga bul tan a ngai a, a chaw a intodelh hmasak phawt angai ani ati. Hemi kawnga hmalakna neih mekah Department lama thawktu ten kuthnathawktute tan thahnemngai taka inpekna tak tak nen an thawhna chu lawmawm a ti a, bawng vulhtute thawhrimzia chu fakawm tiin, kuthnathawktute dinhmun tha zawka hlankai chu sawrkarin a ngaihpawimawh thu a sawi a. State sum indaihlohna karah a theih chin china hmalak pui zel an nih tur thu a sawi. Department  a thawktute leh bawng vulhtu kalkhawmte chu ram innghahna leh hnam zahawma kan insiam theihna tura mawhphurhna kengtu an nih thu a sawi a. Thenzawl Vety Farm a ran chaw (fodder) chinna hmun acre 57 a zau chu Minister Pu C. Lalsawivunga hovin kum 2023-24 chhung khan acre 70 a zauhvin, a vaiin acre 127 a huam ta a ni. Selesih Hay House atangin fodder tharchhuah te hi a thlawnin semchhuah a ni a.Thenzawl bakah AH & Vety Department chuan Selesih, Thingdawl, Lungpuizawl, Mampui leh Siaha ahte ran chaw a ching a ni. He programme hi Dr. R. Zothanmawii, Director, AH & Veterinary Department chuan kaihruaiin, Dr. Lalhmangaiha, Deputy Director chuan technical report a pe a ni.