Ni 19, October, 2019 khan Zoram Poultry Development Society hnuaia INDBRO Poultry Hatchery Farm, Ramrikawn, Tanhril, Aizawl hmalakna a ‘Poultry Value Development in Mizoram’ tlangzarhna leh arte district hrang hranga Mother/Brooding Unit a thawnchhuahna hun neih a ni a, Dr K Beichhua, Minister of State for Animal Husbandry & Veterinary Department chu khuallian niin Pu H Biakzauva, MLA leh Pu Zothantluanga, Bialtu MLA ten he hun hi an telpui a ni.
Minister Dr K Beichhua chuan Animal Husbandry & Veterinary Department a thawktute chu Mizoram in sa leh artui a kan intodelhnan tan la chhunzawm zel turin a chah a, hmasawnna thleng tur chuan kalphung pangai piah lam a thil thar ngaihtuah chhuah a pawimawh thu a sawi. Minister chuan Mizoramah hmasawnna a awm theih nan thil la tih ngailoh, kan ram a la awm ngailo kalphung thar ngaihtuah chhuak peih mi an pawimawh thu sawiin chutiang anga AH & Veterinary Department in arsa hrisel leh hnianghnar zawk a awm theih nana hma an la chu fakawm a tih thu a sawi bawk a ni. Dr K Beichhua chuan Poultry Value Chain Development chu kan ram mamawh tawk arsa tharchhuah kawnga hmanraw tangkai tak ni turin duhsakna a hlan a, department a thawktuten an kalpui zelnaah leh enkawl chhunzawnnaah pawh ram leh mipuiten a hlawkna an hmuh thuai theih nan tha thlah lova thahnemngai taka thawk turin a fuih bawk a ni.
He Poultry Value Chain Development tlangzarhna hun hi Dr Hmarkunga, Director, Animal Husbandry & Veterinary department in a kaihruaia, Dr Lalhmingthanga, Deputy Director (F&FD) in value chain development kalpui dan tur tlangpui presentation pein Incubator leh artui awp keuna khawl hatchery unit te fankualna hun neih a ni a, AH & Vety department directorate a hotute leh district hrang hranga DVO te he hunah an tel a ni.
Value Chain project hnuaiah hian Input services, Day-old chick, feed, medicine, vaccine leh veterinary service te, production service hnuaiah- poultry farm te; processing and marketing hnuaiah ar talhna leh puahna hmun te, arsa zawrhna hmun te, qualified Veterinarian ten awlsam takin an endik thei tawh ang a. Mipui in sa thianghlim zawk leh him zawk an ei thei tawh dawn a ni. Poultry value chain hi thuang hnih (i) Rural and Backyard (Rainbow Rooster) Value Chain leh (ii) Broiler Value Chain a then a ni ang a. Department in infrastructure a neih sa a theih ang anga hman tangkai a ni dawn a ni. Rural and Backyard (Rainbow Rooster) Value Chain hi khawpui pawnlama kalpui a ni ang a, thingtlanga arsa leh artui tam zawk leh him zawk thar chhuah nana hman tangkai tum a ni ang. Hei hi backyard poultry operation (Ar 20-30 vulhtute) leh free range poultry operation (Ar 50 aia tam vulhtute) anga kalpui a ni ang. Department Hatchery atangin District Veterinary Officer ten Rainbow Rooster Day-old chick an la ang a, District Mother Unit ah ni 28 chhung (4 week) an enkawl ang. Chumi hnu ah ar vulhtute hnenah pekchhuah (hralhchhuah) a ni ang. Talh tur (Meat purpose) atana vulh a nih chuan chawlhkar 8-9 thleng an vulh ang a, an chhungkaw ei bak chu aggregator ten an la khawm ang a, district headquarters ah rawn la in district level poultry slaughter and processing unit ah an dah tur a ruahmanna siam a ni ang. Qualified Veterinary Doctor in ulut taka an endik hnu ah chauh arsa chu hralhchhuah a ni dawn a ni.
INDBRO Poultry Hatchery Farm, Ramrikawn, Tanhrilah hian a ruala artui 60,000 awp tir theihna Hatchery building a awm a, Layer 6000 emaw broiler 3000 parent stock awm theihna Layer House awm bawk in ar 4000 dang vulh theihna tur sak belh mek a ni bawk. Kum 2019 January-September thleng khan artui 2,44,906 leh arte 1,47,199 tharchhuah tawh a ni.
