Ni 23.03.2021 khan Food and Agriculture Organization (FAO) Consultant-te leh Animal Husbandry & Veterinary Department hotuten FOCUS Project hnuaia Technical Assistance for Livestock programme kalpui mek thlir letna hun Mizoram State Veterinary Council Conference Hall-ah an nei a. FAO lam atangin Dr AB Negi, National Consultant, Dr MI Barbaruah Principal Consultant leh Dr Rebecca State Coordinator an tel a, Department lam atangin Director, Joint Director leh District Officer leh District Animal Hisbandry Manager (AHM) te an tel ve bawk. 

Mizoram hian international boundary thui tak mai Myanmar leh Bangladesh nen kan neih avangin ram pawn lam atanga natna chi hrang hrang lo kalin min tibuai fo tawh thin a. Mihring kan pung chak a, sa mamawhna a sang chho zel bawk a, chuvangin international border pal tlang a ram pawn atanga ran lo lut pawh a pung zel a. Hei hian ran natna chi hrang hrang lo luh theihna kawng a hawng zau zel a ni. Heng Transboundary Animal Disease-te hian min kian san mai dawn lo a, chuvangin hmachhawn dan tur ruahmanna tha mai bakah thutlukna (decision) rang taka siam theihna tur ingnghahna mumal tak neih a tul a ni. Hri a lo len a rang taka che chhuak thei tur leh rang taka hmet mit thei turin ruahmanna siam zung zung a pawimawh a. Chutiang tithei tur chuan innghahna mumal tak Decision Support System neih a tul ta a ni. Food and Agriculture Organisation (FAO) chuan IFAD-FOCUS Project hnuaia Technical Assistance Programme atangin “Decision Support System (DSS) for management of Transboundary Animal Diseases (TADs)” Mizoram tan min siam sak dawn ta a ni. He Programme hi nikum (2020) October thla atang khan bul tan a ni a. COVID-19 Pandemic avangin hmalak chak theih ni lo mahse tunah chuan a ruangam (structure) engemaw chen chu a lang tan ta a. Hei hi June 2021 ah peih fel hman beisei a ni. Hei hi peih fel a nih hunah Veterinarian te chuan ran hrileng ven kawngah leh outbreak hmachhawn dan thu ah an thiamna awmze nei zawk leh hlawk zawk in an hmang thei dawn a ni. Ran hrisel kan neih chuan mihring hriselna tha zawk kan nei thei ang.