Ni 27.4.2024 zingkar khan tunhnaia social media-a vawk thi kawng sira paih a awm thu bawh zuiin Muallungthu leh Samtlangah AH & Vety Department hotute an kal a.Muallungthu VCP Pu Zonunsiama sawi danin Niminpiah khan Muallungthu leh Tachhip khaw inkara zuanbak luiah vawk thi paih hmuh anih thu report an dawng a,a rang thei ang berin a hmunah kalin vawk thi chu a lo puam hman tawh avangin leh a rimte a lo chhiat tawh avangin thelret/polythene-a a theih ang anga khuh anih hnuah kalsan a ni a,Department hotute nen hian vawk thi hi damdawi nena sawngbawl hnua phum nise an ti a, khawtlangah vawk hrileng chungchanga hriattur pawimawh te zau thei ang bera in hrilh darh nise an ti bawk. Samtlang leh Lungleng khaw inkarah pawh vawk thi kawng sirah paih anih thu bawh zuiin Samtlangah hian VC hruaitute hmuh nghal an ni a, Samtlang VCP Pu K.Zahunga chuan vawk thi paih a awm thu an hriat veleh VC lamin hma an la nghal a,vawk vulhtute ko khawmin,hmalak dan turte an sawipui thu ngaihthlak a ni a,He vawk thi chungchang hi Department hotute nen sawiho niin, a phum hunah damdawite nen sawngbawl a a phumtu turte pawh hmanrua dik tak hmang chunga phum tura rel a ni.

 Tun dinhmunah Muallungthu leh Samtlangah hian ASF vanga vawk thi report dawn  a la ni lo a, vawkvulh tute chiai lo tura hriattir an ni bawk .VCP chuan Department lam ten rang taka buaipui tura an lokal chu lawmthu a sawi a, Khawtlangah mipuia hriat turin ASF chungchanga awareness tha tak neih nise an ti, hetianga vawk thi a awm pawhin paih bo mai lo tur leh Vety Department hotute hnena a rang thei ang bera hrilh hmasa thin tura puanzar nise an ti bawk. Vawk thi paih chungchangah hian dan anga hmala tura rel ani. Heng vawk thi te hi Department mithiam ten anih dan tur ang taka an buaipui hnuah phum an ni. He hunah hian AH & Vety Department atangin Director, Addl Director, Jt Dir (LH),DVO (Aizawl) leh Dy Dir (VE&E) te an kal a ani.