Vawiin Dt 11.9.2026 chhun dar 11:00 ah khan AH & Veterinary Department chuan State Vety Polyclinic Hospital Conference Hall, Khatla, Aizawl ah SASCI Part-VIII chungchang inhrilhfiahna hun ‘Training & Orientation Programme on SASCI Part-VIII’ an hmang. He hun hmang tur hian District hrang hrang atangin Officers leh Paravets mi 165 an kal khawm a ni. He hun hi Khuallian (Chief Guest) Pu Lalsangliana, MCS, Secretary AH&Veterinary Department chuan a hmanpui a ni.
He hun hi Dr Lalrotluanga, Director, AH & Veterinary Departmet in a kaihruai a. He training Programme hlu tak hi Pu Lalsangliana MCS, Secretary, AH & Veterinary Department thahnemngaihna avanga hmang thei an nih thu sawiin, hun hmang tura kalkhawm zawng zawngte hnenah lawmthu a sawi a.
Dr Lalhlimpuii, joint Director (LH) hnen atangin SASCI chungchang ngaihthlak a ni a. SASCI Part-VIII hnuaiah hian India rama State hrang hrang ten Livestock Sector hnuaiah criteria hrang hrang chi 6 ah inelna neih a ni a, State ti tha ber hnenah Financial Assistance Rs 100 Crore pek a ni dawn a ni. Category A, B, C, D-ah then niin Mizoram hi State dang 8 nen Category D hnuaiah kan awm a ni tih sawiin hun hmang tura kalkhawmte chuan he programme-ah hian an thinlung zawng zawng pe turin a chah a ni.
Khuallian Pu Lalsangliana, MCS, Secretary AH & Vety chuan kalkhawmte hnenah he hun hmang tura district hla tak tak atanga an lo kal thei chu lawmawm a tih thu sawiin duhsakna a hlan a. Ran vulhtute leh an ran vulhlaite chungah lainatna leh hmangaihna lantir fo thin turin a chah a ni. SASCI atanga lawmman dawn tur awm hi State tana chhenfakawm tak a nih thu sawiin lawmman dawng thei ngei tura tih tur hrang hrang awmte thahnemngai taka thawk zel a, Bharat Pashdhan Portal kaltlanga data upload ngaite hunbi tiam chhunga upload thei tura tan la sauh sauh turin a fuih a. Data upload chungchangah harsatna a awm a nih pawh a beidawng mai lova a tih dan kawng dang dap zel turin a fuih bawk.
He hunah hian SASCI Nodal Officer, Dr Thangzadinga Dy. Director (LH) leh Dr Ch. Lalthafamkima, Dy. Director (C&M) ten SASCI criteria point hrang hrang inzirtirna leh inhrilhriatna hun an hmang bawk a ni.
