Aizawl dated 28th April 2024: Nimin chawhnu khan Woodland Hills, Ainawn veng ah Indian Veterinary Association bultumin 'Veterinarians are essential health workers' tih thupui hmangin World Veterinary Day lawmna hun an hmang a. Dr. Robert Rualthankhuna, Vice President, IVA chuan hun kaihruaiin Dr. C.Lalchhandama, Asst. Professor, CVSc. & AH, CAU, Selesih chuan thupui sawina hun a hmang a. Dr. C.Lalrintluanga, Director, AH & Vety Department chuan member-te fuih tharna hun a hmang bawk a ni.
AH& Vety Director Dr. C.Lalrintluanga chuan IVA member-te chu Veterinary & Animal Husbandry subject a thiamna bik nei an nih angin sa thianghlim eitur a Mizoram kan intodelh theih nan an thiamna te ṭangkai tak a hmang turin a chah a. Kan thil ei thianghlim leh thianghlim lohna chuan mihring hriselna thui tak a nghawng theih avangin sa hrisel thar chhuahna kawng ah mawhphurhna pawimawh tak an neih thu a sawi. AH &Vety Director chuan sa thianghlim tharchhuahna kawng a hmasawnna sawt lehzual a awm theih nan Sawrkar laipui hnuai ah National Livestock Mission kaltlangin ran vulhtute hnen ah ṭanpuina pek chhuah a nih ṭhin thu a tarlang a. He hamṭhatna hian Mizoram chhung a sa thianghlim eitur kan mamawh ang te a phuhruk zel theih nan hlawhtling tur a ti tak tak peihte hnen a thlen zel a pawimawh thu sawiin NLM hnuai a hamthatna chu zau thei ang ber a puanzar a pawimawh thu a sawi a. Hetih rual hian khawvel ram ṭhenkhat leh Mizoram ngei ah pawh vawk tam tak suat ṭhintu natna, African Swine Fever lak a vawk vulhtute an him theih nan inzirtirna ṭha uar zawk a kalpui a ṭul thu a sawi bawk a ni.
IVA buatsaih a World Veterinary Day 2024 lawmna hun hmanna ah hian member inziahluhna hun leh inhmelhriattirna hun te neih niin Private practitioner-te tan rate ennawn ngaite leh bithliah thar ngaite sawi ho a ni a. IVA hnuai a inkaihhruaina dan ennawn a nih bak ah Mizoram Forest Service hna dil tur a AH & Vety Subject hmang a exam a nih ve thuai theih nana hmalak dan tur te rel a ni. World Veterinary Day 2024 ah hian a vawikhat nan Dr C Sangnghina Rtd Director chu Vety Profession tana a pension hnu thleng a theihtawp a chhuah reng hi chawimawi tlak anih zia lantir nan WVD Pa ah hman a ni.
Kum 2024 - 26 chhung a hruaitu thar inthlanna neih niin a hnuai ami te hi hruaitu thlan tharte chu an ni;
President: Dr. Robert Rualthankhuma
Vice President: Dr V. Lalzarzova
Secretary: Dr. C. Lalchhandama
Asst Secretary: Dr. Joy Lalmuanpuia
Treasurer: Dr. Suzanne Malsawmthangi
Finance: Dr. K. Lalchhanhima
